Agarda que a súa marcha supoña un cambio na xestión da política cultural
realizada polo equipo de goberno de Vilagarcía de Arousa.
Diante das novas aparecidas no día de hoxe polas que
se informa da dimisión do Concelleiro de
Cultura de Vilagarcía de Arousa, o Grupo
Local de ANOVA – Irmandade
Nacionalista non pode menos que celebrar a súa dimisión, que por outra parte xa se debeu
producir hai meses por cuestións
puramente éticas e estéticas.
ANOVA lembra que xa
tiña
solicitado publicamente a dimisión do Concelleiro hai tempo, a través da distribución duns folletos titulados “O enterro da
cultura...” (achégase copia). Nestes folletos informábase aos cidadáns sobre as intencións deste Concelleiro
e do PP de implantar o pago polo uso de
locais públicos e centros
veciñais, de poñerlles taxas aos
grupos musiciais polo acceso aos locais de ensaio e tamén pola utilización dos espazos de
exposición cultural. Xa criticabamos daquela a falta e diálogo do Concelleiro,
a carencia de planificación cultural do
Concello e pediamos a súa dimisión “por non ter
lexitimidade para exercer un cargo despois das subvencións cobradas pola
asociación que representaba e das que non se sabe, ou non se quere
dar conta”.
A semana pasada continuamos a solicitar
a súa dimisión, xa concretamente
pola falta de explicacións claras sobre a
xustificación da actividade “Feirón Solidario”, utilizando incluso
o nome doutras asociacións e ONGs que si fan
traballo social... Nesta ocasión
tamén fixemos carteis e
folletos informativos que distribuímos por toda Vilagarcía.